English laika kaw nna, Myen laika de kalang ta ga gale ya ai software langai hpe internet kaw na manu jahpu n jaw ra ai sha http://www.myanmarnlp.org.mm/ website hta March 27 ya shani kaw nna lenzing ( Download ) galaw la mai sai lam myanmarnlp website kawn chye lu ai. Ndai File size 82.9MB nga ai ga gale software hpe, Windows XP SP2 hte Windows Vista ni hta aloi sha mai lang tim, kaga Windows Version hta gaw garum software hte rau lang ra ai lam hte, ya na ga gale software hpe Myen computer hpaji ninghkrin ni, ga hpungtang hpaji ninghkrin ni hte, Myen Asuya hkring mang dap masum pawng nna shata masum daram aten la galaw shapraw dat ai re lam, chye lu ai.
Ya na software hta, Myen laika dap kaw nna dip shapraw ai English-Myen ga htai chyum hpe madung dat nna, jai lang da ai hte grau hkum tsup ai madang du hkra, gram lajang shapraw sa wa na lam hpe mung, chye lu ai.
Mungkan Amyu sha ni law law a ga ni hte, madang tsaw ai ga gale software ni hpe, jai lang nga ai aten ladaw na sai rai tim, English-Myen ga gale software gaw, ya she nnan hpang wa ai madang re.
Rai tim, Jinghpaw laika lu la ai shanning lasa ning jan sai Wunpawng amyu shani a lapran hta gaw, lai wa sai 1977 ning hta dip shapraw da ai Sara Manam Hpang a Inglik Jinghpaw Myen ga htai chyum hpe sha, ya du hkra manu shadan jai lang nga ai madang naw re ai hpe mu lu ai.
N-pawt: http://www.kachintodayusa.org/
