Myen hpyendu ni buga Rawang shayi ni hpe la na kabai tawn

|

Jinghpaw Mungdaw a dingdung de Putau Ginwang, Naw Mung e magam lit ang ai, Myen hpyen asuya a hpyendu ni gaw, buga Rawang shayi ni hpe la nna, kabai kau ai lam ni galaw nga ai lam, buga masha ni kawn chye lu ai.
2008, September 3 ya shani byin ai Kasang Hka mawru a majaw Naw Mung makau na hkauna eka 100 jan hten mat sai re.
Naw Mung de htawt du wa ai Myen hpyendu ni yawng gaw, buga Rawang shayi ni hte dinghku de nhtawm, shara bai htawt na aming du shagu, tinang a madu jan hte kasha ni hpe kau da ai mabyin ni gaw, ya ten, "htunghking zawn" byin wa sai lam, Naw Mung mare masha ni tsun dan wa ai.

Ndai zawn Myen hpyendu ni amu gun shara htawt ra shagu, tinang a madu jan Rawang shayi ni hkan nang na lam tsun tim, hkrun lam yak ai manghkang hte lam jarit n lu ai manghkang a majaw, n lu hkan nang ai re lam, kahtap tsun dan wa ai.

Ya ten, Naw Mung mare kata, Myen mying hte Rawang ga ga ai Ma kaji jahpan law wa nga ai lam, ya hte sha, Naw Mung kawn yu wa ai Myitkyina buga masha langai KNG de tsun dan wa ai.

Naw Mung mare gaw Putao kawn deng 60 tsan ai rai nna, bat mi hta kalang sha Putau-Naw Mung lapran mawdaw gin hkrang nga ai lam, lahta na Myitkyina buga masha wa tsun dan wa ai re.

Bai nna, Myen gaw Naw Mung hpe Myu hku masat tawn ai raitim, Myu zawn mung n rai, rawt jat ai lam mung nau n nga, mare masha ni malawng gaw, shani shagu hkauna galaw let kanbau bungli galaw nga ma ai lam, sagawn chye lu ai.
N-pawt: KNG

Jinghpaw Mungdaw kata, ‘Wa Li’ hpe sadi maja lam n nga

|

Ya ten, Sina mungdan ni hta 'Swine Flu Virus—Wa Li' a majaw, machyi makaw hte si hkrung si htan lam ni kahtet kamawt byin hkrum hkra nga ai ten, Jinghpaw Mungdaw e gaw, ndai li hpe grai wa sadi maja ai lam n nga ai re.

Bai nna, Wa shan manu raitim, joi mi Kyat 6,000 hte Kyat 5,000 lapran sha naw manu lu nga dingyang re lam, buga masha ni tsun dan wa ai.

“Asuya ni gaw ‘Wa Li’ hte seng na hpa n shana shi ma ai. Kadai pyi n chye ai. Yawng mari sha tik tik sha re. Nkau mi gaw, radio madat nna ‘Wa Li’ byin ai nga, chye ma ai. Ndai kaw byin ai lam n na shi ai” nga nna, Myitkyina buga masha langai tsun wa ai.

Dai re majaw, Wa rem sha ai ni hte Wa shan dut ai ni yawng gaw, alak mi sadi maja ai lam n nga shi ai sha n-ga, mari sha masha ni mung, hkrit tsang ai kumla ni n madun shi dingyang naw re lam, buga masha ni tsun wa ai re.

Bai, Jinghpaw Mungdaw na Wa rem sha ai ni rai yang, ‘Wa’ manu atsawm n lu ai majaw, Kyat sen 3 lu gying ai hpe Kyat sen 2 hte sha dut kau ra nna, sum machyi nga ma ai lam, buga msha ni hpe lakap let chye lu ai.

Myitkyina Wa shan gat lawk hta e, lawu Myen mung na ‘Wa hpraw’ hpe sha, hpaga la ni madung mari la nga ai majaw, Jinghpaw mung na ‘Wa chyang’ ni manu n lu wa ai mung re lam, matut chye lu ai.

Ya ten, ‘Wa’ kaw na byin wa ai 'Swine Flu' ngu ai, kap bra loi ai li gaw, Mexico mungdan kawn byin hpang wa nna, mungdan ga-daga shara shagu chyam bra nga ai majaw, asuya hte asuya n re ai NGO ni kawn, hpaji jaw, makawp maga ai lam ni n hkring n sa galaw nga ai re.

Bai nna mung, dai ning laman Swine Flu, Wa Li a majaw si mat ai masha gaw, Amerikan mungdan kaw sha pyi marai 109 rai sai lam, shanhte a shiga lawk ni hta mu lu nga ai.

N-pawt: KNG

 

©2009 BBUMTSAW.BLOGSPOT.COM | Template Blue by TNB